Subscribe to our newsletter and get our newest updates

Urooj Zaidi Badayuni

  • Ghazal


ehtimam-e-rang-o-bu se gulistan paida karen


ehtimām-e-rañg-o-bū se gulistāñ paidā kareñ
aao mil-jul kar bahār-e-be-ḳhizāñ paidā kareñ

kyuuñ sukūt-e-be-mahal se dāstāñ paidā kareñ
dīda-o-dānista apne rāzdāñ paidā kareñ

raas aa saktā hai mīr-e-kārvāñ banñe kā ḳhvāb
shart ye hai pahle apnā kārvāñ paidā kareñ

kār-ārā.ī to ḳhud hai hāsil-e-takmīl-e-kār
dil meñ kyā andesha-e-sūd-o-ziyāñ paidā kareñ

apnā e'ajāz-e-tasavvur dekhne kī chiiz hai
ham jo chāheñ to makāñ meñ lā-makāñ paidā kareñ

vaqt ko zid hī badal do rasm-e-arz-e-mudda.ā
dil ye kahtā hai ki hañgāma kahāñ paidā kareñ

aap kī marzī kā hai pāband-e-rañg-e-gulistāñ
aap chāheñ to bahār-e-jāvedāñ paidā kareñ

ruuh par haavī na ho jaa.e fazā-e-sogvār
ham ġham-e-dil se nishāt-e-jāvedāñ paidā kareñ

koshish-e-tāmīr kī taḳhrīb-sāmān.ī na pūchh
āshiyāñ-bardār shāḳheñ bijliyāñ paidā kareñ

haañ sikhā deñ rañg-e-ruḳh ko ā.ina-dārī kā fan
bahr-e-arz-e-mudda.ā ham tarjumāñ paidā kareñ

phir bulātā tuuñ ke ye tevar kahāñ baaqī 'urūj'
hāl-e-dil kah kar javāb-e-darmiyāñ paidā kareñ

ehtimam-e-rang-o-bu se gulistan paida karen
aao mil-jul kar bahaar-e-be-KHizan paida karen

kyun sukut-e-be-mahal se dastan paida karen
dida-o-danista apne raazdan paida karen

ras aa sakta hai mir-e-karwan banne ka KHwab
shart ye hai pahle apna karwan paida karen

kar-arai to KHud hai hasil-e-takmil-e-kar
dil mein kya andesha-e-sud-o-ziyan paida karen

apna e'ajaz-e-tasawwur dekhne ki chiz hai
hum jo chahen to makan mein la-makan paida karen

waqt ko zid hi badal do rasm-e-arz-e-muddaa
dil ye kahta hai ki hangama kahan paida karen

aap ki marzi ka hai paband-e-rang-e-gulistan
aap chahen to bahaar-e-jawedan paida karen

ruh par hawi na ho jae faza-e-sogwar
hum gham-e-dil se nishat-e-jawedan paida karen

koshish-e-tamir ki taKHrib-samani na puchh
aashiyan-bardar shaKHen bijliyan paida karen

han sikha den rang-e-ruKH ko aaina-dari ka fan
bahr-e-arz-e-muddaa hum tarjuman paida karen

phir bulata tun ke ye tewar kahan baqi 'uruj'
haal-e-dil kah kar jawab-e-darmiyan paida karen


Leave a comment

+