zard pattoñ ko havā saath liye phirtī hai
dam-gazīda haiñ qazā saath liye phirtī hai

raakh ho jaa.e na fāqoñ ke jahannam meñ hayāt
be-kasī apnī chitā saath liye phirtī hai

maañ ke hoñToñ se thī niklī dam-e-ruḳhsat jo duā
mujh ko ab tak vo duā saath liye phirtī hai

aas kī raakh meñ DhūñDeñ na.ī ummīd koī
zindagī bīm-o-rajā saath liye phirtī hai

sach kā hai qaht yahāñ jhuuT kā bāzār hai garm
ab hameñ mauj-e-fanā saath liye phirtī hai

ek patthar hai bahut jhiil ke sannāTe ko
ḳhāmushī koh-e-nidā saath liye phirtī hai

apne saa.e se gurezāñ nahīñ ik tū hī 'rabāb'
shahr bhar ko ye vabā saath liye phirtī hai

zard patton ko hawa sath liye phirti hai
dam-gazida hain qaza sath liye phirti hai

rakh ho jae na faqon ke jahannam mein hayat
be-kasi apni chita sath liye phirti hai

man ke honTon se thi nikli dam-e-ruKHsat jo dua
mujh ko ab tak wo dua sath liye phirti hai

aas ki rakh mein DhunDen nai ummid koi
zindagi bim-o-raja sath liye phirti hai

sach ka hai qaht yahan jhuT ka bazar hai garm
ab hamein mauj-e-fana sath liye phirti hai

ek patthar hai bahut jhil ke sannaTe ko
KHamushi koh-e-nida sath liye phirti hai

apne sae se gurezan nahin ek tu hi 'rabab'
shahr bhar ko ye waba sath liye phirti hai