zindagī kī raushnī ke isti.āre ḳhvāb haiñ
dekhiye ta.abīr kyā ho kitne pyāre ḳhvāb haiñ

buḳhl hai karte nahīñ ḳhvāboñ kī ḳhushiyoñ meñ sharīk
aao ham dete haiñ tum ko jo hamāre ḳhvāb haiñ

jin kī āñkheñ thī haqīqat ke tajassus meñ magan
un kā dāmāñ dekhiye saare ke saare ḳhvāb haiñ

jāgte meñ so rahā thā un ke jazboñ kā shu.ūr
niiñd us kī hai magar us meñ hamāre ḳhvāb haiñ

be-sukūñ lamhoñ meñ sonā hai girāñ ehsās kā
qarz hai ta.abīr un kī jo udhāre ḳhvāb haiñ

so gayā thā vaqt ke neze pe sar rakkhe hue
maiñ ne ye kaisī bulandī se utāre ḳhvāb haiñ

ham haqīqat meñ guzar jā.eñge ḳhvāboñ kī tarah
raushnī, zulmat, mah-o-ḳhurshīd saare ḳhvāb haiñ

zindagi ki raushni ke istiare KHwab hain
dekhiye tabir kya ho kitne pyare KHwab hain

buKHl hai karte nahin KHwabon ki KHushiyon mein sharik
aao hum dete hain tum ko jo hamare KHwab hain

jin ki aankhen thi haqiqat ke tajassus mein magan
un ka daman dekhiye sare ke sare KHwab hain

jagte mein so raha tha un ke jazbon ka shuur
nind us ki hai magar us mein hamare KHwab hain

be-sukun lamhon mein sona hai giran ehsas ka
qarz hai tabir un ki jo udhaare KHwab hain

so gaya tha waqt ke neze pe sar rakkhe hue
main ne ye kaisi bulandi se utare KHwab hain

hum haqiqat mein guzar jaenge KHwabon ki tarah
raushni, zulmat, mah-o-KHurshid sare KHwab hain