maddāh huuñ maiñ dil se mohammad kī aal kā
mushtāq huuñ vasī-e-nabī ke jamāl kā

ḳhvāhāñ guhar kā huuñ na maiñ tālib huuñ laal kā
mushtāq huuñ tumhāre dahan ke ugaal kā

dekho to ek jā pe Thahartī nahīñ nazar
lapkā paḌā hai aañkh ko kyā dekh-bhāl kā

kyā un se faiz pahuñche jo ḳhud tīra-baḳht haiñ
khilte na dekhā ham ne kabhī phuul Dhaal kā

ham haiñ faqīr daulat-e-duniyā se kaam kyā
behtar hai jām-e-jam se piyāla sifāl kā

daana dikhā ke daam meñ anqā ko lā.ūñgā
mazmūn likh rahā huuñ tire ḳhat-o-ḳhāl kā

sau jaan se fidā huuñ mohammad ke naam par
jis ne batāyā farq harām o halāl kā

vo aañkh bhī uThā ke hameñ dekhte nahīñ
rutba pahuñch gayā hai ye rañj-o-malāl kā

kis zindagī ke vāste daulat kī aarzū
dekho natīja ġhaur se qārūñ ke maal kā

iqbāl gar nahīñ hai tū inkār kījiye
kuchh dījiye javāb hamāre savāl kā

muTThī ko khol kar yad-e-baizā dikhāte haiñ
nāḳhun pe un ke hotā hai dhokā hilāl kā

shā.er ġhazab ke hote haiñ hargiz na chūkte
mauqa.a nahīñ dahan meñ tire qīl-o-qāl kā

ai rashk-e-mehr vasl meñ ġhussa hai kis liye
ye vaqt merī jaan nahīñ hai jalāl kā

tārīkī-e-lahad se kuchh 'āġhā' na ḳhauf kar
dāman hai tere haath meñ zahrā ke laal kā

maddah hun main dil se mohammad ki aal ka
mushtaq hun wasi-e-nabi ke jamal ka

KHwahan guhar ka hun na main talib hun lal ka
mushtaq hun tumhaare dahan ke ugal ka

dekho to ek ja pe Thaharti nahin nazar
lapka paDa hai aankh ko kya dekh-bhaal ka

kya un se faiz pahunche jo KHud tira-baKHt hain
khilte na dekha hum ne kabhi phul Dhaal ka

hum hain faqir daulat-e-duniya se kaam kya
behtar hai jam-e-jam se piyala sifal ka

dana dikha ke dam mein anqa ko launga
mazmun likh raha hun tere KHat-o-KHal ka

sau jaan se fida hun mohammad ke nam par
jis ne bataya farq haram o halal ka

wo aankh bhi uTha ke hamein dekhte nahin
rutba pahunch gaya hai ye ranj-o-malal ka

kis zindagi ke waste daulat ki aarzu
dekho natija ghaur se qarun ke mal ka

iqbaal gar nahin hai tu inkar kijiye
kuchh dijiye jawab hamare sawal ka

muTThi ko khol kar yad-e-baiza dikhate hain
naKHun pe un ke hota hai dhoka hilal ka

shaer ghazab ke hote hain hargiz na chukte
mauqa nahin dahan mein tere qil-o-qal ka

ai rashk-e-mehr wasl mein ghussa hai kis liye
ye waqt meri jaan nahin hai jalal ka

tariki-e-lahad se kuchh 'agha' na KHauf kar
daman hai tere hath mein zahra ke lal ka