Subscribe to our newsletter and get our newest updates

Faizi Nizam Puri

  • Ghazal


kuchh zindagi mein lutf ka saman nahin raha


kuchh zindagī meñ lutf kā sāmāñ nahīñ rahā
dil aisā bujh gayā koī armāñ nahīñ rahā

vo josh-e-be-ḳhudī kā hai aalam ki āj-kal
zindāñ meñ ham nahīñ haiñ ki zindāñ nahīñ rahā

vo dil hī kyā ḳhalish hī na ho jis meñ dard kī
vo gul hī kyā jo zīnat-e-dāmāñ nahīñ rahā

har inqalāb vaqt ke sāñche meñ Dhal gayā
markaz pe apne ab koī insāñ nahīñ rahā

har ek apnā ḳhuun piye jā rahā hai aaj
insān is zamāne meñ insāñ nahīñ rahā

hotī hai ab tarannum-e-dilkash pe vaah vaah
bazm-e-suḳhan meñ koī suḳhan-dāñ nahīñ rahā

laayā hai us ko khīñch ke shauq-e-adab yahāñ
'faizī' kabhī bhī daad kā ḳhvāhāñ nahīñ rahā

kuchh zindagi mein lutf ka saman nahin raha
dil aisa bujh gaya koi arman nahin raha

wo josh-e-be-KHudi ka hai aalam ki aaj-kal
zindan mein hum nahin hain ki zindan nahin raha

wo dil hi kya KHalish hi na ho jis mein dard ki
wo gul hi kya jo zinat-e-daman nahin raha

har inqalab waqt ke sanche mein Dhal gaya
markaz pe apne ab koi insan nahin raha

har ek apna KHun piye ja raha hai aaj
insan is zamane mein insan nahin raha

hoti hai ab tarannum-e-dilkash pe wah wah
bazm-e-suKHan mein koi suKHan-dan nahin raha

laya hai us ko khinch ke shauq-e-adab yahan
'faizi' kabhi bhi dad ka KHwahan nahin raha


Source: Deewan-e-Aagha

Leave a comment

+