Subscribe to our newsletter and get our newest updates

Ezaz Afzal

  • Ghazal


ujala kaisa ujale ka KHwab la na sake


ujālā kaisā ujāle kā ḳhvāb lā na sake
sahar se maañg ke ham āftāb lā na sake

ham apne chehra-e-be-dāġh ke liye ai aql
tirī dukān se koī naqāb lā na sake

jo chāñd par bhī ga.e ham to ḳhaak hī laa.e
zamīñ kī nazr ko ik āftāb lā na sake

ga.e to the tire jalvoñ ko jāñchne lekin
bachā ke ham nazar-e-intiḳhāb lā na sake

zamīñ kī baat zamīñ kī zabāñ meñ kahnā thī
ham āsmān se koī kitāb lā na sake

ujala kaisa ujale ka KHwab la na sake
sahar se mang ke hum aaftab la na sake

hum apne chehra-e-be-dagh ke liye ai aql
teri dukan se koi naqab la na sake

jo chand par bhi gae hum to KHak hi lae
zamin ki nazr ko ek aaftab la na sake

gae to the tere jalwon ko jaanchne lekin
bacha ke hum nazar-e-intiKHab la na sake

zamin ki baat zamin ki zaban mein kahna thi
hum aasman se koi kitab la na sake


Leave a comment

+