Subscribe to our newsletter and get our newest updates

Hafeez Jalandhari

  • Ghazal


agar mauj hai bich dhaare chala chal


agar mauj hai biich dhāre chalā chal
vagarna kināre kināre chalā chal

isī chaal se mere pyāre chalā chal
guzartī hai jaise guzāre chalā chal

tujhe saath denā hai bahrūpiyoñ kā
na.e se nayā ruup dhāre chalā chal

ḳhudā ko na taklīf de Dūbne meñ
kisī nāḳhudā ke sahāre chalā chal

pahuñch jā.eñge qabr meñ paañv tere
pasāre chalā chal pasāre chalā chal

ye uupar kā tabqa ḳhalā hī ḳhalā hai
havā o havas ke ġhubāre chalā chal

Duboyā hai tū ne hayā kā safīna
mire dost siina ubhāre chalā chal

musalsal butoñ kī tamannā kiye jā
musalsal ḳhudā ko pukāre chalā chal

yahāñ to bahr-e-hāl jhuknā paḌegā
nahīñ to kisī aur dvāre chalā chal

tujhe to abhī der tak khelnā hai
isī meñ to hai jiit haare chalā chal

na de fursat-e-dam-zadan o zamāne
na.e se nayā tiir maare chalā chal

shab-e-tār hai ta-ba-sub.h-e-qayāmat
muqaddar hai gardish sitāre chalā chal

kahāñ se chalā thā kahāñ tak chalegā
chalā chal masāfat ke maare chalā chal

basīrat nahīñ hai to sīrat bhī kyuuñ ho
faqat shakl o sūrat sañvāre chalā chal

'hafīz' is na.e daur meñ tujh ko fan kā
nasha hai to pyāre utāre chalā chal

agar mauj hai bich dhaare chala chal
wagarna kinare kinare chala chal

isi chaal se mere pyare chala chal
guzarti hai jaise guzare chala chal

tujhe sath dena hai bahrupiyon ka
nae se naya rup dhaare chala chal

KHuda ko na taklif de Dubne mein
kisi naKHuda ke sahaare chala chal

pahunch jaenge qabr mein panw tere
pasare chala chal pasare chala chal

ye upar ka tabqa KHala hi KHala hai
hawa o hawas ke ghubare chala chal

Duboya hai tu ne haya ka safina
mere dost sina ubhaare chala chal

musalsal buton ki tamanna kiye ja
musalsal KHuda ko pukare chala chal

yahan to bahr-e-haal jhukna paDega
nahin to kisi aur dware chala chal

tujhe to abhi der tak khelna hai
isi mein to hai jit haare chala chal

na de fursat-e-dam-zadan o zamane
nae se naya tir mare chala chal

shab-e-tar hai ta-ba-subh-e-qayamat
muqaddar hai gardish sitare chala chal

kahan se chala tha kahan tak chalega
chala chal masafat ke mare chala chal

basirat nahin hai to sirat bhi kyun ho
faqat shakl o surat sanware chala chal

'hafiz' is nae daur mein tujh ko fan ka
nasha hai to pyare utare chala chal


Leave a comment

+