tīra-o-tār zamīnoñ ke ujāle dariyā
ham ne sahrāoñ ke siine se nikāle dariyā

vādiyāñ aa.eñ to ārām se so jaate haiñ
fāsloñ se na kabhī hārne vaale dariyā

chāhte the ki phireñ rū-e-zamīñ par har sū
ban ga.e raah meñ ġhāroñ ke nivāle dariyā

tujh se chhuTne pe tire dhyān kī āġhosh milī
kar gayā mujh ko samundar ke havāle dariyā

ai zamīñ suukh rahe haiñ tire pyāse jañgal
kyā hue haiñ tirī āġhosh ke paale dariyā

kis tarah dard kā tūfāñ mire siine meñ thame
kis tarah apnī ravānī ko sambhāle dariyā

tira-o-tar zaminon ke ujale dariya
hum ne sahraon ke sine se nikale dariya

wadiyan aaen to aaram se so jate hain
faslon se na kabhi haarne wale dariya

chahte the ki phiren ru-e-zamin par har su
ban gae rah mein ghaaron ke niwale dariya

tujh se chhuTne pe tere dhyan ki aaghosh mili
kar gaya mujh ko samundar ke hawale dariya

ai zamin sukh rahe hain tere pyase jangal
kya hue hain teri aaghosh ke pale dariya

kis tarah dard ka tufan mere sine mein thame
kis tarah apni rawani ko sambhaale dariya