go mubtalā-e-gardish-e-shām-o-sahar huuñ maiñ
phir bhī dayār-e-ishq meñ chīz-e-digar huuñ maiñ

maiñ chāhtā huuñ jis ko vo dilbar tum hī to ho
tum DhūñDte ho jis ko vo ahl-e-nazar huuñ maiñ

pīr-e-haram kā qaul hai maiñ shab-gazīda huuñ
pīr-e-muġhāñ kī raa.e meñ nūr-e-sahar huuñ maiñ

ahl-e-chaman kī kashmakash-e-rozgār kī
tārīkī-e-hayāt meñ misl-e-qamar huuñ maiñ

raushan mire vajūd se sarv-o-saman hue
sehn-e-chaman ke vāste nūr-e-sahar huuñ maiñ

maiñ māntā nahīñ ki vo ġhaflat-shi.ār hai
rasm-e-vafā ke zer-e-asar kis qadar huuñ maiñ

ummīd kar rahā huuñ maiñ takmīl-e-shauq kī
kis ko batā.ūñ kis qadar āshufta-sar huuñ maiñ

go maiñ rah-e-hayāt meñ be-dast-o-pā huā
phir bhī muhīt-e-ishq meñ mahv-e-safar huuñ maiñ

merā muqābla nahīñ parvāz-e-fikr meñ
hālāñki josh-e-ishq meñ be-bāl-o-par huuñ maiñ

arz-o-samā ke rāz-e-darūñ se huuñ āshnā
goyā sharīk-e-mahfil-e-shams-o-qamar huuñ maiñ

mujh ko ḳhabar hai kyā hai pas-e-parda-e-namāz
go shaiḳh kā ḳhayāl hai ki be-ḳhabar huuñ maiñ

go mubtala-e-gardish-e-sham-o-sahar hun main
phir bhi dayar-e-ishq mein chiz-e-digar hun main

main chahta hun jis ko wo dilbar tum hi to ho
tum DhunDte ho jis ko wo ahl-e-nazar hun main

pir-e-haram ka qaul hai main shab-gazida hun
pir-e-mughan ki rae mein nur-e-sahar hun main

ahl-e-chaman ki kashmakash-e-rozgar ki
tariki-e-hayat mein misl-e-qamar hun main

raushan mere wajud se sarw-o-saman hue
sehn-e-chaman ke waste nur-e-sahar hun main

main manta nahin ki wo ghaflat-shiar hai
rasm-e-wafa ke zer-e-asar kis qadar hun main

ummid kar raha hun main takmil-e-shauq ki
kis ko bataun kis qadar aashufta-sar hun main

go main rah-e-hayat mein be-dast-o-pa hua
phir bhi muhit-e-ishq mein mahw-e-safar hun main

mera muqabla nahin parwaz-e-fikr mein
haalanki josh-e-ishq mein be-baal-o-par hun main

arz-o-sama ke raaz-e-darun se hun aashna
goya sharik-e-mahfil-e-shams-o-qamar hun main

mujh ko KHabar hai kya hai pas-e-parda-e-namaz
go shaiKH ka KHayal hai ki be-KHabar hun main

Source: Book : Pakistani Adab (Pg. 498) Author : Dr. Rashid Amjad Publication : Pakistan Academy of Letters, Islambad, Pakistan (2009) Edition : 2009