fareb-e-nau ke bhañvar meñ utārtā hai mujhe
ye kaun pichhle pahar phir pukārtā hai mujhe

shikasta-hāl huuñ rañj-o-alam se chuur huuñ maiñ
nigāh-e-lutf se ab kyā sañvārtā hai mujhe

nazar ye apnī chaḌhātā huuñ jis qadar us ko
usī qadar vo nazar se utārtā hai mujhe

maiñ kab kā Duub chukā huuñ use ḳhabar hī nahīñ
jo sāhiloñ se abhī tak pukārtā hai mujhe

usī kī yaad hai merī hayāt kā hāsil
jo be-niyāz taġhāful se mārtā hai mujhe

maiñ sulh-o-amn kā shaidā.ī huuñ mire rahbar
fasād-o-fitna pe tū kyuuñ ubhārtā hai mujhe

milā hai muddatoñ ke ba.ad kuchh ġharaz hogī
kis inkisār se dekho nihārtā hai mujhe

use maiñ ḳhaas karam meñ shumār kartā huuñ
jo tū marāhil-e-ġham se guzārtā hai mujhe

vo chāhtā hai guhar-yāb ho ke ubhrūñ maiñ
samundaroñ kī jo tah tak utārtā hai mujhe

punam kī raat kā ye faiz nūr-afshāñ 'chāñd'
kisī hasīn ḳhatā par ubhārtā hai mujhe

fareb-e-nau ke bhanwar mein utarta hai mujhe
ye kaun pichhle pahar phir pukarta hai mujhe

shikasta-haal hun ranj-o-alam se chur hun main
nigah-e-lutf se ab kya sanwarta hai mujhe

nazar ye apni chaDhata hun jis qadar us ko
usi qadar wo nazar se utarta hai mujhe

main kab ka Dub chuka hun use KHabar hi nahin
jo sahilon se abhi tak pukarta hai mujhe

usi ki yaad hai meri hayat ka hasil
jo be-niyaz taghaful se marta hai mujhe

main sulh-o-amn ka shaidai hun mere rahbar
fasad-o-fitna pe tu kyun ubhaarta hai mujhe

mila hai muddaton ke baad kuchh gharaz hogi
kis inkisar se dekho nihaarta hai mujhe

use main KHas karam mein shumar karta hun
jo tu marahil-e-gham se guzarta hai mujhe

wo chahta hai guhar-yab ho ke ubhrun main
samundaron ki jo tah tak utarta hai mujhe

punam ki raat ka ye faiz nur-afshan 'chand'
kisi hasin KHata par ubhaarta hai mujhe