Subscribe to our newsletter and get our newest updates

Imam Bakhsh Nasikh

  • Ghazal


jaan hum tujh pe diya karte hain


jaan ham tujh pe diyā karte haiñ
naam terā hī liyā karte haiñ

chaak karne ke liye ai nāseh
ham garebān siyā karte haiñ

sāġhar-e-chashm se ham bāda-parast
mai-e-dīdār piyā karte haiñ

zindagī zinda-dilī kā hai naam
murda-dil ḳhaak jiyā karte haiñ

sañg-e-asvad bhī hai bhārī patthar
log jo chuum liyā karte haiñ

kal na degā koī miTTī bhī unheñ
aaj zar jo ki diyā karte haiñ

dafn mahbūb jahāñ haiñ 'nāsiḳh'
qabreñ ham chuum liyā karte haiñ

jaan hum tujh pe diya karte hain
nam tera hi liya karte hain

chaak karne ke liye ai naseh
hum gareban siya karte hain

saghar-e-chashm se hum baada-parast
mai-e-didar piya karte hain

zindagi zinda-dili ka hai nam
murda-dil KHak jiya karte hain

sang-e-aswad bhi hai bhaari patthar
log jo chum liya karte hain

kal na dega koi miTTi bhi unhen
aaj zar jo ki diya karte hain

dafn mahbub jahan hain 'nasiKH'
qabren hum chum liya karte hain


Leave a comment

+