ham ne jab koī bhī darvāza khulā paayā hai
kitnī guzrī huī bātoñ kā ḳhayāl aayā hai

qāfila dard kā Thahregā kahāñ ham-safaro
koī manzil hai na bastī na kahīñ saayā hai

ek sahmā huā sunsān galī kā nukkaḌ
shahr kī bhiiḌ meñ aksar mujhe yaad aayā hai

yuuñ liye phirtā huuñ TuuTe hue ḳhvāboñ kī salīb
ab yahī jaise mirī ziist kā sarmāya hai

shahr meñ ek bhī āvāra nahīñ ab ke baras
mausam-e-lāla-o-gul kaisī ḳhabar laayā hai

un kī TuuTī huī dīvār kā saaya 'āzar'
dhuup meñ kyuuñ mire hamrāh chalā aayā hai

hum ne jab koi bhi darwaza khula paya hai
kitni guzri hui baaton ka KHayal aaya hai

qafila dard ka Thahrega kahan ham-safaro
koi manzil hai na basti na kahin saya hai

ek sahma hua sunsan gali ka nukkaD
shahr ki bhiD mein aksar mujhe yaad aaya hai

yun liye phirta hun TuTe hue KHwabon ki salib
ab yahi jaise meri zist ka sarmaya hai

shahr mein ek bhi aawara nahin ab ke baras
mausam-e-lala-o-gul kaisi KHabar laya hai

un ki TuTi hui diwar ka saya 'azar'
dhup mein kyun mere hamrah chala aaya hai

Source: Book : Veeran sarai ka diya (Pg. 43)