kabhī na sochā thā maiñ ne uḌaan bharte hue
ki ranj hogā zamīñ par mujhe utarte hue

ye shauq-e-ġhota-zanī to nayā nahīñ phir bhī
utar rahā huuñ maiñ gahrā.iyoñ meñ Darte hue

havā ke rahm-o-karam par charāġh rahne do
ki Dar rahā huuñ na.e tajrabāt karte hue

na jaane kaisā samundar hai ishq kā jis meñ
kisī ko dekhā nahīñ Duub ke ubharte hue

maiñ us gharāne kā chashm o charāġh huuñ jis kī
hayāt guzrī hai ḳhvāboñ meñ rañg bharte hue

maiñ sab se miltā rahā hañs ke is tarah ki mujhe
kisī ne dekhā nahīñ TūTte bikharte hue

'farāġh' aise bhī insān maiñ ne dekhe haiñ
jo sach kī raah meñ paa.e ga.e haiñ marte hue

kabhi na socha tha main ne uDan bharte hue
ki ranj hoga zamin par mujhe utarte hue

ye shauq-e-ghota-zani to naya nahin phir bhi
utar raha hun main gahraiyon mein Darte hue

hawa ke rahm-o-karam par charagh rahne do
ki Dar raha hun nae tajrabaat karte hue

na jaane kaisa samundar hai ishq ka jis mein
kisi ko dekha nahin Dub ke ubharte hue

main us gharane ka chashm o charagh hun jis ki
hayat guzri hai KHwabon mein rang bharte hue

main sab se milta raha hans ke is tarah ki mujhe
kisi ne dekha nahin TuTte bikharte hue

'faragh' aise bhi insan main ne dekhe hain
jo sach ki rah mein pae gae hain marte hue

Source: Sulagti Barf