Subscribe to our newsletter and get our newest updates

Hafeez Jaunpuri

  • Ghazal


wo ham-kanar hai jam-e-sharab hath mein hai


vo ham-kanār hai jām-e-sharāb haath meñ hai
baġhal meñ chāñd hai aur āftāb haath meñ hai

pilā ke piir ko sāġhar javāñ banātā hai
maza hai pīr-e-muġhāñ ke shabāb haath meñ hai

bar aa.ī aaj mire dil kī aarzū sad shukr
ki dāman aap kā roz-e-hisāb haath meñ hai

ye aa.e kis ke qadam dast-e-mauj se dariyā
liye hue jo kulāh habāb haath meñ hai

araq visāl meñ poñchhā hai gul se gāloñ ko
yahī hai vaj.h ki bū-e-gulāb haath meñ hai

bin aa.ī hai mire dast-e-havas kī vasl kī shab
hinā lagā.e jo vo mast-e-ḳhvāb haath meñ hai

havā se tez vo aatā hai nāma-bar merā
niyāz-nāme kā mere javāb haath meñ hai

khile haiñ gul gul aariz ke vasf meñ sar-e-dast
qalam mirā hai ki shāḳh-e-gulāb haath meñ hai

'hafīz' aap kā dīvān ye huā maqbūl
ki jis ko dekho liye ye kitāb haath meñ hai

wo ham-kanar hai jam-e-sharab hath mein hai
baghal mein chand hai aur aaftab hath mein hai

pila ke pir ko saghar jawan banata hai
maza hai pir-e-mughan ke shabab hath mein hai

bar aai aaj mere dil ki aarzu sad shukr
ki daman aap ka roz-e-hisab hath mein hai

ye aae kis ke qadam dast-e-mauj se dariya
liye hue jo kulah habab hath mein hai

araq visal mein ponchha hai gul se galon ko
yahi hai wajh ki bu-e-gulab hath mein hai

bin aai hai mere dast-e-hawas ki wasl ki shab
hina lagae jo wo mast-e-KHwab hath mein hai

hawa se tez wo aata hai nama-bar mera
niyaz-name ka mere jawab hath mein hai

khile hain gul gul aariz ke wasf mein sar-e-dast
qalam mera hai ki shaKH-e-gulab hath mein hai

'hafiz' aap ka diwan ye hua maqbul
ki jis ko dekho liye ye kitab hath mein hai


Source: Book : siip (Magzin) (Pg. 231) Author : Nasiim Durraani Publication : Fikr-e-Nau (39 (Quarterly)) Edition : 39 (Quarterly)

Leave a comment

+