log jannat meñ jā rahe hoñge
aur ham saTpaTā rahe hoñge

tum baġhāvat kī baat karte ho
ham to rasmeñ nibhā rahe hoñge

be-zabānī-o-nā-rasā.ī meñ
ham ḳhudā ko bulā rahe hoñge

vo kahīñ giit gā rahī hogī
ham kahīñ tilmilā rahe hoñge

husn mash.hūr ho rahā hogā
log bāteñ banā rahe hoñge

log jannat mein ja rahe honge
aur hum saTpaTa rahe honge

tum baghawat ki baat karte ho
hum to rasmen nibha rahe honge

be-zabani-o-na-rasai mein
hum KHuda ko bula rahe honge

wo kahin git ga rahi hogi
hum kahin tilmila rahe honge

husn mashhur ho raha hoga
log baaten bana rahe honge