hazār martaba dekhā sitam judā.ī kā
hanūz hausla baaqī hai āshnā.ī kā

parī uThī mire pahlū se bārhā nākām
farefta huuñ tirī tarz-e-dilrubā.ī kā

mujhe azāb-e-jahannam ki but-parast huuñ maiñ
vo but bahisht meñ da.avā jise ḳhudā.ī kā

fazā-e-bāġh se hai gosha-e-qafas ḳhush-tar
gar apne dil meñ na ho daġhdaġha rihā.ī kā

adab na vādī-e-vahshat ke mujh se tark hue
junūñ meñ hosh rahā hai barhana-pā.ī kā

nigāh ḳhanda taġhāful itaab kohna hue
nikāl tarz nayā koī dilrubā.ī kā

butoñ kā sajda mirī sarnavisht meñ kab thā
ki azm ka.abe ke dar par ho jubba-sā.ī kā

uchak rahā hai khaḌā bām-e-arsh par kam-baḳht
qalaq hai mujh ko 'shahīdī' kī nā-rasā.ī kā

hazar martaba dekha sitam judai ka
hanuz hausla baqi hai aashnai ka

pari uThi mere pahlu se barha nakaam
farefta hun teri tarz-e-dilrubai ka

mujhe azab-e-jahannam ki but-parast hun main
wo but bahisht mein dawa jise KHudai ka

faza-e-bagh se hai gosha-e-qafas KHush-tar
gar apne dil mein na ho daghdagha rihai ka

adab na wadi-e-wahshat ke mujh se tark hue
junun mein hosh raha hai barhana-pai ka

nigah KHanda taghaful itab kohna hue
nikal tarz naya koi dilrubai ka

buton ka sajda meri sarnawisht mein kab tha
ki azm kabe ke dar par ho jubba-sai ka

uchak raha hai khaDa baam-e-arsh par kam-baKHt
qalaq hai mujh ko 'shahidi' ki na-rasai ka

Source: Book : Intekhab Kalam Lala M.R Jauhar (Pg. 46)