miT gayā ġham tire takallum se
lab hue āshnā tabassum se

kis ke naqsh-e-qadam haiñ rāhoñ meñ
jagmagāte haiñ māh-o-anjum se

hai zamāna baḌā zamāna-shanās
kabhī mujh se gilā kabhī tum se

nāḳhudā bhī milā to aisā milā
āshnā jo nahīñ talātum se

us ne aa kar mizāj pūchh liyā
ham to baiThe hue the gum-sum se

nāḳhudā ne Dubo diyā un ko
vo ki jo bach ga.e talātum se

zindagī hādsoñ kī zad meñ hai
koī kaise bache tasādum se

sāya-e-gul meñ baiThne vaalo
guftugū hogī daar par tum se

maiñ ġhazal kā asiir huuñ 'ejāz'
sher paḌhtā huuñ maiñ tarannum se

miT gaya gham tere takallum se
lab hue aashna tabassum se

kis ke naqsh-e-qadam hain rahon mein
jagmagate hain mah-o-anjum se

hai zamana baDa zamana-shanas
kabhi mujh se gila kabhi tum se

naKHuda bhi mila to aisa mila
aashna jo nahin talatum se

us ne aa kar mizaj puchh liya
hum to baiThe hue the gum-sum se

naKHuda ne Dubo diya un ko
wo ki jo bach gae talatum se

zindagi hadson ki zad mein hai
koi kaise bache tasadum se

saya-e-gul mein baiThne walo
guftugu hogi dar par tum se

main ghazal ka asir hun 'ejaz'
sher paDhta hun main tarannum se