Subscribe to our newsletter and get our newest updates

Daood Mohsin

  • Ghazal


dekhna ho gar bana kar kanch ka ghar dekhna


dekhnā ho gar banā kar kāñch kā ghar dekhnā
kaun barsātā hai kis jānib se patthar dekhnā

merī palkoñ par aTī hai gard ranj-o-karb kī
dard āñkhoñ meñ samāyā hai samundar dekhnā

apnī ḳhāmushī banegī jab fasāna ai nadīm
log hāthoñ meñ liye ā.eñge patthar dekhnā

maiñ hī ik hairāñ nahīñ huuñ dam-ba-ḳhud haiñ sab yahāñ
qaum ko le jā.eñge kis samt rahbar dekhnā

aap apne vāste rakh leñ charāġh-e-ārzī
bas mirā sheva hai zulmat meñ utar kar dekhnā

hai vafāoñ par bharosa rañg lā.eñgī zarūr
jaag uTThegā kabhī merā muqaddar dekhnā

ḳhatm ḳhūn-e-dil huā kaise bhareñ rañg-e-vafā
kyā banā pā.eñge ham tasvīr-e-dilbar dekhnā

zāviye apnī uḌānoñ ke badalne lag ga.e
kaun dam letā hai 'mohsin' ab kahāñ par dekhnā

dekhna ho gar bana kar kanch ka ghar dekhna
kaun barsata hai kis jaanib se patthar dekhna

meri palkon par aTi hai gard ranj-o-karb ki
dard aankhon mein samaya hai samundar dekhna

apni KHamushi banegi jab fasana ai nadim
log hathon mein liye aaenge patthar dekhna

main hi ek hairan nahin hun dam-ba-KHud hain sab yahan
qaum ko le jaenge kis samt rahbar dekhna

aap apne waste rakh len charagh-e-arzi
bas mera shewa hai zulmat mein utar kar dekhna

hai wafaon par bharosa rang laengi zarur
jag uTThega kabhi mera muqaddar dekhna

KHatm KHun-e-dil hua kaise bharen rang-e-wafa
kya bana paenge hum taswir-e-dilbar dekhna

zawiye apni uDanon ke badalne lag gae
kaun dam leta hai 'mohsin' ab kahan par dekhna


2009"

Leave a comment

+