ek to ishq kī taqsīr kiye jaatā huuñ
us pe maiñ pairvī-e-'mīr' kiye jaatā huuñ

ma.azarat ghar ke charāġhoñ se karūñgā kaise
maiñ jo tāḳhīr pe tāḳhīr kiye jaatā huuñ

ya.anī tasvīr-e-zamāñ par hai tasarruf itnā
dekhtā jaatā huuñ tahrīr kiye jaatā huuñ

bāġhbāñ tujh se to maiñ dād-talab huuñ bhī nahīñ
peḌ sunte haiñ maiñ taqrīr kiye jaatā huuñ

ye ilāqa na ho dariyā kī amal-dārī meñ
maiñ jahāñ naav ko zanjīr kiye jaatā huuñ

āḳhirash ḳhaak uḌā kar sar-e-rāhe dil kī
ek duniyā ko maiñ dil-gīr kiye jaatā huuñ

us kī buniyād meñ ik ḳhām-e-ḳhayālī hai 'na.īm'
shahr jo ḳhvāb meñ ta.amīr kiye jaatā huuñ

ek to ishq ki taqsir kiye jata hun
us pe main pairwi-e-'mir' kiye jata hun

mazarat ghar ke charaghon se karunga kaise
main jo taKHir pe taKHir kiye jata hun

yani taswir-e-zaman par hai tasarruf itna
dekhta jata hun tahrir kiye jata hun

baghban tujh se to main dad-talab hun bhi nahin
peD sunte hain main taqrir kiye jata hun

ye ilaqa na ho dariya ki amal-dari mein
main jahan naw ko zanjir kiye jata hun

aaKHirash KHak uDa kar sar-e-rahe dil ki
ek duniya ko main dil-gir kiye jata hun

us ki buniyaad mein ek KHam-e-KHayali hai 'naim'
shahr jo KHwab mein tamir kiye jata hun