Subscribe to our newsletter and get our newest updates

Jameel Mazhari

  • Ghazal


kuchh bhi nahin hai aalam-e-zarraat se aage


kuchh bhī nahīñ hai ālam-e-zarrāt se aage
ik ālam-e-hū ālam-e-asvāt se aage

milte haiñ smāvāt smavāt se aage
har gaam hijābāt hijābāt se aage

is dahr meñ ham ḳhud bhī haiñ minjumala ḳhurāfāt
kis tarah nazar jaa.e ḳhurāfāt se aage

ai raat ke maaro tumheñ kis tarah bujhā.ūñ
ik sub.h bhī ik din bhī hai is raat se aage

insāñ haiñ magar biich kī manzil meñ khaḌe haiñ
haivān se pīchhe haiñ jamādāt se aage

jo kuchh hai yahāñ vo hai ḳharābāt ke andar
kuchh bhī nahīñ ai riñd ḳharābāt se aage

kyā sochte ho zehn meñ vo aa nahīñ saktā
kyā sochte ho hai vo ḳhayālāt se aage

hone ko vo jaisā bhī ho ham haiñ to vo hogā
ḳhāmoshī hī ḳhāmoshī hai is baat se aage

samjheñge vahī zehn 'jamīl' apne suḳhan ko
jaatī hai nazar jin kī tabī.āt se aage

kuchh bhi nahin hai aalam-e-zarraat se aage
ek aalam-e-hu aalam-e-aswat se aage

milte hain smawat smawat se aage
har gam hijabaat hijabaat se aage

is dahr mein hum KHud bhi hain minjumala KHurafat
kis tarah nazar jae KHurafat se aage

ai raat ke maro tumhein kis tarah bujhaun
ek subh bhi ek din bhi hai is raat se aage

insan hain magar bich ki manzil mein khaDe hain
haiwan se pichhe hain jamadat se aage

jo kuchh hai yahan wo hai KHarabaat ke andar
kuchh bhi nahin ai rind KHarabaat se aage

kya sochte ho zehn mein wo aa nahin sakta
kya sochte ho hai wo KHayalat se aage

hone ko wo jaisa bhi ho hum hain to wo hoga
KHamoshi hi KHamoshi hai is baat se aage

samjhenge wahi zehn 'jamil' apne suKHan ko
jati hai nazar jin ki tabiat se aage


Leave a comment

+