Subscribe to our newsletter and get our newest updates

Badiuzzaman Khawar

  • Ghazal


mujhko nahin malum ki wo kaun hai kya hai


mujh ko nahīñ ma.alūm ki vo kaun hai kyā hai
jo saa.e ke mānind mire saath lagā hai

ik aur bhī hai jism mire jism ke andar
ik aur bhī chehra mire chehre meñ chhupā hai

mahtāb to aa.egā na sīḌhī se utar kar
dīvāna kis ummīd pe raste meñ khaḌā hai

milne kī tamannā hai magar us se mileñ kyā
jis shaḳhs kā is shahr meñ ghar hai na patā hai

likhtā huuñ na.ī nazm-o-ġhazal jis ke sabab maiñ
vo zauq-e-suḳhan to mujhe virse meñ milā hai

maidāñ meñ chale aao to khul jaa.e ye tum par
kyā shaam kī sarshār havāoñ meñ mazā hai

sochā thā mire saath chalegā jo safar meñ
ghar par vo mirā ḳhvāb-e-hasīñ chhūT gayā hai

ham 'mīr' kā dīvān the kyā fahm pe khulte
aḳhbār samajh kar hameñ logoñ ne paḌhā hai

kahte haiñ ki us shahr meñ hai dhuum hamārī
dekhā hai kisī ne na jahāñ ham ko sunā hai

bāhar se koī aaj to 'ḳhāvar' ko pukāre
kamre meñ bahut roz se vo band paḌā hai

mujh ko nahin malum ki wo kaun hai kya hai
jo sae ke manind mere sath laga hai

ek aur bhi hai jism mere jism ke andar
ek aur bhi chehra mere chehre mein chhupa hai

mahtab to aaega na siDhi se utar kar
diwana kis ummid pe raste mein khaDa hai

milne ki tamanna hai magar us se milen kya
jis shaKHs ka is shahr mein ghar hai na pata hai

likhta hun nai nazm-o-ghazal jis ke sabab main
wo zauq-e-suKHan to mujhe wirse mein mila hai

maidan mein chale aao to khul jae ye tum par
kya sham ki sarshaar hawaon mein maza hai

socha tha mere sath chalega jo safar mein
ghar par wo mera KHwab-e-hasin chhuT gaya hai

hum 'mir' ka diwan the kya fahm pe khulte
aKHbar samajh kar hamein logon ne paDha hai

kahte hain ki us shahr mein hai dhum hamari
dekha hai kisi ne na jahan hum ko suna hai

bahar se koi aaj to 'KHawar' ko pukare
kamre mein bahut roz se wo band paDa hai


Source: Book : Deewan-e-Nadir (Pg. 251) Author : Abul Khayal Nadir Shahjahanpuri Publication : Jasper Paul John Robert paul memorial Society Jhansi U.P (2015) Edition : 2015

Leave a comment

+