Subscribe to our newsletter and get our newest updates

Fahmi Badayuni

  • Ghazal


parinde sahme sahme uD rahe hain


parinde sahme sahme uḌ rahe haiñ
barābar meñ farishte uḌ rahe haiñ

ḳhushī se kab ye tinke uḌ rahe haiñ
havā ke Dar ke maare uḌ rahe haiñ

kahīñ koī kamāñ taane hue hai
kabūtar āḌe-tirchhe uḌ rahe haiñ

tumhārā ḳhat havā meñ uḌ rahā hai
ta.āqub meñ lifāfe uḌ rahe haiñ

bahut kahtī rahī āñdhī se chiḌiyā
ki pahlī baar bachche uḌ rahe haiñ

shajar ke sabz pattoñ kī havā se
fazā meñ ḳhushk patte uḌ rahe haiñ

parinde sahme sahme uD rahe hain
barabar mein farishte uD rahe hain

KHushi se kab ye tinke uD rahe hain
hawa ke Dar ke mare uD rahe hain

kahin koi kaman tane hue hai
kabutar aaDe-tirchhe uD rahe hain

tumhaara KHat hawa mein uD raha hai
taaqub mein lifafe uD rahe hain

bahut kahti rahi aandhi se chiDiya
ki pahli bar bachche uD rahe hain

shajar ke sabz patton ki hawa se
faza mein KHushk patte uD rahe hain


Leave a comment

+