dard mīThī zabāñ pe rakh aa.e
tiir ya.anī kamāñ pe rakh aa.e

ek lamhe ne maar lī baazī
lafz us kī zabāñ pe rakh aa.e

raqs karte the chāñd ke paañv
kuchh sitāre vahāñ pe rakh aa.e

ishq aise maqām par laayā
sar ko nok-e-sināñ pe rakh aa.e

dil kī dahlīz par jo raushan thā
vo 'diyā' tum kahāñ pe rakh aa.e

dard miThi zaban pe rakh aae
tir yani kaman pe rakh aae

ek lamhe ne mar li bazi
lafz us ki zaban pe rakh aae

raqs karte the chand ke panw
kuchh sitare wahan pe rakh aae

ishq aise maqam par laya
sar ko nok-e-sinan pe rakh aae

dil ki dahliz par jo raushan tha
wo 'diya' tum kahan pe rakh aae