Subscribe to our newsletter and get our newest updates

Hakeem Aagha Jan Aish

  • Ghazal


na KHushi se hamein na gham se gharaz


na ḳhushī se hameñ na ġham se ġharaz
hai magar ek us sanam se ġharaz

na hameñ jaam se na ḳhum se ġharaz
yaar rakhte haiñ apne dam se ġharaz

nahīñ parvā koī jiye ki mare
hai unheñ rāt-din sitam se ġharaz

jo ki shākir haiñ apnī qismat par
nahīñ kuchh un ko besh-o-kam se ġharaz

ham rasūl-e-ḳhudā kī ummat haiñ
hai hameñ shāfa-e-umam se ġharaz

aur tasadduq se us ke rakhte haiñ
apne allāh ke ham karam se ġharaz

'aish' jo us nigah ke āshiq haiñ
un ko kyā ḳhanjar-e-do-dam se ġharaz

na KHushi se hamein na gham se gharaz
hai magar ek us sanam se gharaz

na hamein jam se na KHum se gharaz
yar rakhte hain apne dam se gharaz

nahin parwa koi jiye ki mare
hai unhen raat-din sitam se gharaz

jo ki shakir hain apni qismat par
nahin kuchh un ko besh-o-kam se gharaz

hum rasul-e-KHuda ki ummat hain
hai hamein shafa-e-umam se gharaz

aur tasadduq se us ke rakhte hain
apne allah ke hum karam se gharaz

'aish' jo us nigah ke aashiq hain
un ko kya KHanjar-e-do-dam se gharaz


Source: Book : Shab Charagh (Pg. 29) Author : Bakhtiyar Ziya Publication : Markaz-e-adab (1993) Edition : 1993

Leave a comment

+