Subscribe to our newsletter and get our newest updates

Vasaf Basit

  • Ghazal


pari safar mein ramaq tak nahin gai hogi


parī safar meñ ramaq tak nahīñ ga.ī hogī
mujhe pata hai dhanak tak nahīñ ga.ī hogī

ye āsmān jo ma.amūl ke mutābiq hai
zamīñ kī chīḳh falak tak nahīñ ga.ī hogī

nazar meñ aatī huī tīrgī ḳhalāoñ beach
ye raushnī bhī chamak tak nahīñ ga.ī hogī

use ḳhabar hai tabī.at hī merī aisī hai
mujhe yaqīñ hai vo shak tak nahīñ ga.ī hogī

ye lafz yūñhī pighalte raheñge kāġhaz par
ye aag shahr-e-ḳhunak tak nahīñ ga.ī hogī

phir āsmān kā manzar jalā huā dekhā
kisī kī aañkh parakh tak nahīñ ga.ī hogī

vo phir ḳhamosh nigāheñ liye hue 'bāsit'
mirī kisī bhī jhalak tak nahīñ ga.ī hogī

pari safar mein ramaq tak nahin gai hogi
mujhe pata hai dhanak tak nahin gai hogi

ye aasman jo mamul ke mutabiq hai
zamin ki chiKH falak tak nahin gai hogi

nazar mein aati hui tirgi KHalaon beach
ye raushni bhi chamak tak nahin gai hogi

use KHabar hai tabiat hi meri aisi hai
mujhe yaqin hai wo shak tak nahin gai hogi

ye lafz yunhi pighalte rahenge kaghaz par
ye aag shahr-e-KHunak tak nahin gai hogi

phir aasman ka manzar jala hua dekha
kisi ki aankh parakh tak nahin gai hogi

wo phir KHamosh nigahen liye hue 'basit'
meri kisi bhi jhalak tak nahin gai hogi


Leave a comment

+