phir us ruup meñ aanā tum
phir se raas rachānā tum

mahkoñ gulshan gulshan meñ
mausam pe chhā jaanā tum

phir maiñ añdhere oḌhūñgā
phir ik diip jalānā tum

baḳhshī tum ne din ko raat
ujyārā bhī laanā tum

jab maiñ duur chalā jā.ūñ
mujh ko paas bulānā tum

bhaTkūñ jañgal jañgal maiñ
shāḳh pe phuul khilānā tum

'khullar' mīThe bol kahe
Daalī Daalī gaanā tum

phir us rup mein aana tum
phir se ras rachana tum

mahkon gulshan gulshan mein
mausam pe chha jaana tum

phir main andhere oDhunga
phir ek dip jalana tum

baKHshi tum ne din ko raat
ujyara bhi lana tum

jab main dur chala jaun
mujh ko pas bulana tum

bhaTkun jangal jangal main
shaKH pe phul khilana tum

'khullar' miThe bol kahe
Dali Dali gana tum