Subscribe to our newsletter and get our newest updates

Baqar Mehdi

  • Ghazal


is darja hua KHush ki Dara dil se bahut main


is darja huā ḳhush ki Darā dil se bahut maiñ
ḳhud toḌ diyā baḌh ke tamannāoñ kā dhāgā

taaki na banūñ phir kahīñ ik banda-e-majbūr
haañ qaid-e-mohabbat se yahī soch ke bhāgā

Thokar jo lagī apne azā.em ne sambhālā
maiñ ne to kabhī koī sahārā nahīñ māñgā

chaltā rahā maiñ ret pe pyāsā tan-e-tanhā
bahtī rahī kuchh duur pe ik pyaar kī gañgā

maiñ tujh ko magar jaan gayā sham-e-tamannā
samjhī thī ki jal jā.egā shā.er hai patiñgā

āñkhoñ meñ abhī tak hai ḳhumār-e-ġham-e-jānāñ
jaise ki koī ḳhvāb-e-mohabbat se hai jaagā

jo ḳhud ko badal dete haiñ is daur meñ 'bāqar'
karte haiñ haqīqat meñ vo sone pe suhāgā

is darja hua KHush ki Dara dil se bahut main
KHud toD diya baDh ke tamannaon ka dhaga

taki na banun phir kahin ek banda-e-majbur
han qaid-e-mohabbat se yahi soch ke bhaga

Thokar jo lagi apne azaem ne sambhaala
main ne to kabhi koi sahaara nahin manga

chalta raha main ret pe pyasa tan-e-tanha
bahti rahi kuchh dur pe ek pyar ki ganga

main tujh ko magar jaan gaya sham-e-tamanna
samjhi thi ki jal jaega shaer hai patinga

aankhon mein abhi tak hai KHumar-e-gham-e-jaanan
jaise ki koi KHwab-e-mohabbat se hai jaga

jo KHud ko badal dete hain is daur mein 'baqar'
karte hain haqiqat mein wo sone pe suhaga

RECITATIONS Nomaan Shauque



00:00/00:00 is darja hua KHush ki Dara dil se bahut main Nomaan Shauque

Source: Book : Jadeed Shora-e-Urdu (Pg. 527) Author : Dr. Abdul Wahid Publication : Feroz sons Printers Publishers and Stationers

Leave a comment

+