jo ḳhvāb meñ huā thā vāqa.ī na ho
ki maiñ pukārtā rahūñ koī na ho

charāġh be-sabab to ro nahīñ rahe
jo shab guzar rahī hai āḳhirī na ho

jise sukūt-e-marg kā nishāñ kaheñ
ye ḳhāmushī kahīñ vo ḳhāmushī na ho

paḌī huī hai gard sī jo vaqt par
ye chashm-e-ḳhvāb-zād se girī na ho

mujhe ye hukm bhī sunā diyā gayā
ki naav meñ mire sivā koī na ho

yaqīñ bharī-bahār kā bhī kuchh nahīñ
agar ye shāḳh-e-dard hī harī na ho

mirā mo.āmla 'na.īm' aur hai
agar tirī nazar meñ sarsarī na ho

jo KHwab mein hua tha waqai na ho
ki main pukarta rahun koi na ho

charagh be-sabab to ro nahin rahe
jo shab guzar rahi hai aaKHiri na ho

jise sukut-e-marg ka nishan kahen
ye KHamushi kahin wo KHamushi na ho

paDi hui hai gard si jo waqt par
ye chashm-e-KHwab-zad se giri na ho

mujhe ye hukm bhi suna diya gaya
ki naw mein mere siwa koi na ho

yaqin bhari-bahaar ka bhi kuchh nahin
agar ye shaKH-e-dard hi hari na ho

mera moamla 'naim' aur hai
agar teri nazar mein sarsari na ho