Subscribe to our newsletter and get our newest updates

Iftikhar Naseem

  • Ghazal


nam bhi jis ka zaban par tha duaon ki tarah


naam bhī jis kā zabāñ par thā duāoñ kī tarah
vo mujhe miltā rahā nā-āshnāoñ kī tarah

aa ki tere muntazir haiñ aaj bhī dīvār-o-dar
gūñjtā hai ghar meñ sannāTā sadāoñ kī tarah

vo shajar jaltā rahā ḳhud kis kaḌaktī dhuup meñ
jis kā saaya thā mire sar par ghaTāoñ kī tarah

jhuk rahe the baaġh ke sab phuul us ke sāmne
ghaas par baiThā thā vo farmāñ-ravāoñ kī tarah

maiñ bhalā kaise use ik ajnabī kah duuñ 'nasīm'
jis ne dekhā thā palaT kar āshnāoñ kī tarah

nam bhi jis ka zaban par tha duaon ki tarah
wo mujhe milta raha na-ashnaon ki tarah

aa ki tere muntazir hain aaj bhi diwar-o-dar
gunjta hai ghar mein sannaTa sadaon ki tarah

wo shajar jalta raha KHud kis kaDakti dhup mein
jis ka saya tha mere sar par ghaTaon ki tarah

jhuk rahe the bagh ke sab phul us ke samne
ghas par baiTha tha wo farman-rawaon ki tarah

main bhala kaise use ek ajnabi kah dun 'nasim'
jis ne dekha tha palaT kar aashnaon ki tarah


Source: Lahoo Rang

Leave a comment

+