zehan aur dil meñ jo rahtī hai chubhan khul jaa.e
aa.e kāġhaz pe to salmā-e-suḳhan khul jaa.e

qatra-e-dīda-e-namnāk masīhā.ī kare
fikr ke band darīchoñ kī shikan khul jaa.e

maiñ use roz manātā huuñ sahar hone tak
mere allāh kisī shab to ye dulhan khul jaa.e

ek ḳhushbū sī hai jo ruuh kī gahrā.ī meñ
lafz mil jaa.eñ to ma.anī kā chaman khul jaa.e

is tarah jaage kisī roz ġhazal kā jaadū
jaise mastī meñ piyā se koī jogan khul jaa.e

nīm-shab ijz-o-samājat se karūñ dast darāz
lafz dhone ke liye āñkhoñ meñ sāvan khul jaa.e

sar-kashī aur tajāvuz se bachānā yārab
mere ehsās meñ gar yaas kā phan khul jaa.e

zehan aur dil mein jo rahti hai chubhan khul jae
aae kaghaz pe to salma-e-suKHan khul jae

qatra-e-dida-e-namnak masihai kare
fikr ke band darichon ki shikan khul jae

main use roz manata hun sahar hone tak
mere allah kisi shab to ye dulhan khul jae

ek KHushbu si hai jo ruh ki gahrai mein
lafz mil jaen to mani ka chaman khul jae

is tarah jage kisi roz ghazal ka jadu
jaise masti mein piya se koi jogan khul jae

nim-shab ijz-o-samajat se karun dast daraaz
lafz dhone ke liye aankhon mein sawan khul jae

sar-kashi aur tajawuz se bachana yarab
mere ehsas mein gar yas ka phan khul jae

Source: Book : Aaina-e-Dil (Pg. 71) Author : Dil Ayubi Publication : Nazish Book Center Lahore (1995) Edition : 1995