Subscribe to our newsletter and get our newest updates

Jameel Yusuf

  • Ghazal


phir ruk nahin saka hun kisi bhi chaTan se


phir ruk nahīñ sakā huuñ kisī bhī chaTān se
aisā girā huuñ roz-e-azal āsmān se

hai jabr meñ bhī ek gumāñ iḳhtiyār kā
do chaar har qadam pe hoñ ik imtihān se

ab maiñ huuñ aur havāoñ kī sāzish kā sāmnā
ik tiir huuñ chalā huuñ qazā kī kamān se

ik aa.ina ki jis meñ kahīñ baal paḌ gayā
ik silsila ki TuuT gayā darmiyān se

gum-sum khaḌe haiñ ab dar-o-dīvār aur maiñ
vo log kab ke jā bhī chuke haiñ makān se

ḳhushiyāñ jo mujh ko mil na sakīñ is jahān meñ
mujh ko bulā rahī haiñ na.e ik jahān se

is baat kā 'jamīl' mujhe kuchh pata nahīñ
iqrār kar rahā huuñ maiñ jis kā zabān se

phir ruk nahin saka hun kisi bhi chaTan se
aisa gira hun roz-e-azal aasman se

hai jabr mein bhi ek guman iKHtiyar ka
do chaar har qadam pe hon ek imtihan se

ab main hun aur hawaon ki sazish ka samna
ek tir hun chala hun qaza ki kaman se

ek aaina ki jis mein kahin baal paD gaya
ek silsila ki TuT gaya darmiyan se

gum-sum khaDe hain ab dar-o-diwar aur main
wo log kab ke ja bhi chuke hain makan se

KHushiyan jo mujh ko mil na sakin is jahan mein
mujh ko bula rahi hain nae ek jahan se

is baat ka 'jamil' mujhe kuchh pata nahin
iqrar kar raha hun main jis ka zaban se


Source: Book : Ishq Abaab (Pg. 403) Author : Abbas Tabish Edition : 2011

Leave a comment

+