Subscribe to our newsletter and get our newest updates

Dagh Dehlvi

  • Ghazal


hath nikle apne donon kaam ke


haath nikle apne donoñ kaam ke
dil ko thāmā un kā dāman thaam ke

ghūñT pī kar bāda-e-gulfām ke
bose le letā huuñ ḳhālī jaam ke

raat din phirtā hai kyuuñ ai charḳh-e-pīr
tere din haiñ rāhat o ārām ke

is nazākat kā burā ho bazm se
uThte haiñ vo dast-e-dushman thaam ke

chashm-e-mast-e-yār kī ik dhuum hai
aaj kal haiñ daur daur-e-jām ke

yā jigar meñ yā rahegā dil meñ tiir
ye hī do goshe to haiñ ārām ke

vo kareñ uzr-e-vafā achchhī kahī
mujh pe radde rakhte haiñ ilzām ke

jab qadam kaabe se rakkhā sū-e-dair
taar uljhe jāma-e-ehrām ke

ḳhush haiñ vo daur-e-falak se aaj kal
din phire haiñ gardish-e-ayyām ke

aa gayā hai bhuul kar ḳhat is taraf
vo to āshiq haiñ mire hamnām ke

haath se sayyād ke gir kar chhurī
kaT ga.e halqe hamāre daam ke

qāsidoñ ke muntazir rahne lage
paḌ ga.e un ko maze paiġhām ke

kyā kisī dargāh meñ jaanā hai aaj
sub.h se sāmān haiñ hammām ke

pūchhte haiñ hazrat-e-zāhid se rind
daam kyā haiñ jāma-e-ehrām ke

lab utar aa.e haiñ vo tārīf par
ham jo aadī ho ga.e dushnām ke

dāva-e-ishq-o-vafā par ye kahā
sab bajā lekin mire kis kaam ke

ban-sañvar kar kab bigaḌtā hai banāo
sub.h tak rahte haiñ jalve shaam ke

jaur se yā lutf se puurā kiyā
aap pīchhe paḌ ga.e jis kaam ke

hai gadā-e-mai-kada bhī kyā harīs
bhar liye jholī meñ TukḌe jaam ke

naala o fariyād kī tāqat kahāñ
baat kartā huuñ kalejā thaam ke

ḳhūgar-e-bedād ko rāhat hai maut
bhāgtā huuñ naam se ārām ke

'dāġh' ke sab harf likhte haiñ judā
TukḌe kar Daale hamāre naam ke

hath nikle apne donon kaam ke
dil ko thama un ka daman tham ke

ghunT pi kar baada-e-gulfam ke
bose le leta hun KHali jam ke

raat din phirta hai kyun ai charKH-e-pir
tere din hain rahat o aaram ke

is nazakat ka bura ho bazm se
uThte hain wo dast-e-dushman tham ke

chashm-e-mast-e-yar ki ek dhum hai
aaj kal hain daur daur-e-jam ke

ya jigar mein ya rahega dil mein tir
ye hi do goshe to hain aaram ke

wo karen uzr-e-wafa achchhi kahi
mujh pe radde rakhte hain ilzam ke

jab qadam kabe se rakkha su-e-dair
tar uljhe jama-e-ehram ke

KHush hain wo daur-e-falak se aaj kal
din phire hain gardish-e-ayyam ke

aa gaya hai bhul kar KHat is taraf
wo to aashiq hain mere hamnam ke

hath se sayyaad ke gir kar chhuri
kaT gae halqe hamare dam ke

qasidon ke muntazir rahne lage
paD gae un ko maze paigham ke

kya kisi dargah mein jaana hai aaj
subh se saman hain hammam ke

puchhte hain hazrat-e-zahid se rind
dam kya hain jama-e-ehram ke

lab utar aae hain wo tarif par
hum jo aadi ho gae dushnam ke

dawa-e-ishq-o-wafa par ye kaha
sab baja lekin mere kis kaam ke

ban-sanwar kar kab bigaDta hai banao
subh tak rahte hain jalwe sham ke

jaur se ya lutf se pura kiya
aap pichhe paD gae jis kaam ke

hai gada-e-mai-kada bhi kya haris
bhar liye jholi mein TukDe jam ke

nala o fariyaad ki taqat kahan
baat karta hun kaleja tham ke

KHugar-e-bedad ko rahat hai maut
bhagta hun nam se aaram ke

'dagh' ke sab harf likhte hain juda
TukDe kar Dale hamare nam ke

RECITATIONS Fasih Akmal



00:00/00:00 hath nikle apne donon kaam ke Fasih Akmal

Pachas Sala Intekhab"

Leave a comment

+