Subscribe to our newsletter and get our newest updates

Fani Jodhpuri

  • Ghazal


chalan is doghli duniya ka gar manzur ho jata


chalan is doġhlī duniyā kā gar manzūr ho jaatā
vo mujh se duur ho jaatā maiñ us se duur ho jaatā

hunar hāthoñ se chikne kā bachā kar le gayā mujh ko
bharose paañv ke rahtā to maiñ ma.azūr ho jaatā

zamāne-bhar kī bātoñ ko agar dil se lagā letā
jahāñ pe dil dhaḌaktā hai vahāñ nāsūr ho jaatā

safar karte hue apnā haTā kar aañkh se paTTī
maiñ sañg-e-mīl jo paḌhtā thakan se chuur ho jaatā

ye 'fānī' dil kī suntā hai tabhī gumnām hai ab tak
agar ye zehn kī suntā bahut mash.hūr ho jaatā

chalan is doghli duniya ka gar manzur ho jata
wo mujh se dur ho jata main us se dur ho jata

hunar hathon se chikne ka bacha kar le gaya mujh ko
bharose panw ke rahta to main mazur ho jata

zamane-bhar ki baaton ko agar dil se laga leta
jahan pe dil dhaDakta hai wahan nasur ho jata

safar karte hue apna haTa kar aankh se paTTi
main sang-e-mil jo paDhta thakan se chur ho jata

ye 'fani' dil ki sunta hai tabhi gumnam hai ab tak
agar ye zehn ki sunta bahut mashhur ho jata


Leave a comment

+