Subscribe to our newsletter and get our newest updates

Bakhsh Layalpuri

  • Ghazal


kabhi aankhon pe kabhi sar pe biThae rakhna


kabhī āñkhoñ pe kabhī sar pe biThā.e rakhnā
zindagī talḳh sahī dil se lagā.e rakhnā

lafz to lafz haiñ kāġhaz se bhī ḳhushbū phūTe
safha-e-vaqt pe vo phuul khilā.e rakhnā

chāñd kyā chiiz hai sūraj bhī ubhar aa.egā
zulmat-e-shab meñ lahū dil kā jalā.e rakhnā

hurmat-e-harf pe ilzām na aane paa.e
suḳhan-e-haq ko sar-e-dār sajā.e rakhnā

farsh to farsh falak par bhī sunā.ī degā
merī āvāz meñ āvāz milā.e rakhnā

kabhī vo yaad bhī aa.e to malāmat karnā
kabhī us shoḳh kī tasvīr banā.e rakhnā

'baḳhsh' sīkhā hai shahīdān-e-vafā se ham ne
haath kaT jaa.eñ alam muñh se uThā.e rakhnā

kabhi aankhon pe kabhi sar pe biThae rakhna
zindagi talKH sahi dil se lagae rakhna

lafz to lafz hain kaghaz se bhi KHushbu phuTe
safha-e-waqt pe wo phul khilae rakhna

chand kya chiz hai suraj bhi ubhar aaega
zulmat-e-shab mein lahu dil ka jalae rakhna

hurmat-e-harf pe ilzam na aane pae
suKHan-e-haq ko sar-e-dar sajae rakhna

farsh to farsh falak par bhi sunai dega
meri aawaz mein aawaz milae rakhna

kabhi wo yaad bhi aae to malamat karna
kabhi us shoKH ki taswir banae rakhna

'baKHsh' sikha hai shahidan-e-wafa se hum ne
hath kaT jaen alam munh se uThae rakhna


Leave a comment

+