ġhamoñ kī bhiiḌ ne kuchlā hai mujh ko shādmānī meñ
lagānā chāhtā thā tishnagī kī aag paanī meñ

har ik shai uḌ ga.ī merī havāoñ kī ravānī se
simaT ke rah ga.ī ḳhvāhish vafāoñ kī javānī meñ

hamesha chashm meñ rahnā mujhe achchhā nahīñ lagtā
maiñ rahnā chāhtā huuñ ai samundar tere paanī meñ

tirī bastī ke mujre se tirī auqāt kyā pūchhūñ
gad.he bhī sher ban jaate apnī mezbānī meñ

maiñ paḌh kar hosh kho baiThā tire qisse ko ai furqat
mohabbat kā nasha hai is shab-e-ġham kī kahānī meñ

vo piilī oḌhnī vaalī abhī bhī dil meñ rahtī hai
ye laḌkā kho gayā hai us ke rañg-e-zāfrānī meñ

vo jis din 'faiz' aa.egī merī chaukhaT pe milne ko
usī din mo.ajiza hogā mirī bhī zindagānī meñ

ghamon ki bhiD ne kuchla hai mujh ko shadmani mein
lagana chahta tha tishnagi ki aag pani mein

har ek shai uD gai meri hawaon ki rawani se
simaT ke rah gai KHwahish wafaon ki jawani mein

hamesha chashm mein rahna mujhe achchha nahin lagta
main rahna chahta hun ai samundar tere pani mein

teri basti ke mujre se teri auqat kya puchhun
gadhe bhi sher ban jate apni mezbani mein

main paDh kar hosh kho baiTha tere qisse ko ai furqat
mohabbat ka nasha hai is shab-e-gham ki kahani mein

wo pili oDhni wali abhi bhi dil mein rahti hai
ye laDka kho gaya hai us ke rang-e-zafrani mein

wo jis din 'faiz' aaegi meri chaukhaT pe milne ko
usi din moajiza hoga meri bhi zindagani mein

Source: Deewan-e-Aagha