be-bāk na dekhā koī qātil ke barābar
sharm aañkh meñ paa.ī na ga.ī til ke barābar

dushman koī ai yaar mirā aur tirā dost
hogā na zamāne meñ mire dil ke barābar

dil muttasil-e-kūcha-e-mahbūb huā gum
luTnā thā pahuñch kar mujhe manzil ke barābar

kam-baḳhtī-e-vā.iz hai ki ho va.az kī sohbat
rindān-e-qadah-nosh kī mahfil ke barābar

ham pī ga.e jo ashk qarīb-e-mizha aayā
kashtī huī jab ġharq to sāhil ke barābar

aahoñ ke sharar gard nahīñ dāġh-e-jigar ke
tābinda haiñ aḳhtar mah-e-kāmil ke barābar

parda na uThā qais ne lailā ko na dekhā
jhoñkā bhī na aayā koī mahmil ke barābar

maqtal meñ ye hasrat rahī ai zo.af pas-e-zab.h
pahuñche na taḌap kar kisī bismil ke barābar

ghar tak dar-e-jānāñ se 'jalāl' aa.iye kyuuñ kar
ek ek qadam hai ka.ī manzil ke barābar

be-bak na dekha koi qatil ke barabar
sharm aankh mein pai na gai til ke barabar

dushman koi ai yar mera aur tera dost
hoga na zamane mein mere dil ke barabar

dil muttasil-e-kucha-e-mahbub hua gum
luTna tha pahunch kar mujhe manzil ke barabar

kam-baKHti-e-waiz hai ki ho waz ki sohbat
rindan-e-qadah-nosh ki mahfil ke barabar

hum pi gae jo ashk qarib-e-mizha aaya
kashti hui jab gharq to sahil ke barabar

aahon ke sharar gard nahin dagh-e-jigar ke
tabinda hain aKHtar mah-e-kaamil ke barabar

parda na uTha qais ne laila ko na dekha
jhonka bhi na aaya koi mahmil ke barabar

maqtal mein ye hasrat rahi ai zoaf pas-e-zabh
pahunche na taDap kar kisi bismil ke barabar

ghar tak dar-e-jaanan se 'jalal' aaiye kyun kar
ek ek qadam hai kai manzil ke barabar

Source: Jalwa-e-sab rang