āñkhoñ ko ik ḳhvāb dikhāyā jā saktā hai
qissa yūsuf kā dohrāyā jā saktā hai

saarī duniyā ko Thukrāyā jā saktā hai
husn-o-ishq duā se paayā jā saktā hai

jo mujh meñ ho zuleḳhā tujh meñ yūsuf koī
umroñ kā sarmāya laayā jā saktā hai

us ko kahnā mirī āñkhoñ ke kaase meñ
diid kā ik sikka to dikhāyā jā saktā hai

nādāñ itnā mat samjho tum dil ko 'amabar'
kab yādoñ se ise bahlāyā jā saktā hai

aankhon ko ek KHwab dikhaya ja sakta hai
qissa yusuf ka dohraya ja sakta hai

sari duniya ko Thukraya ja sakta hai
husn-o-ishq dua se paya ja sakta hai

jo mujh mein ho zuleKHa tujh mein yusuf koi
umron ka sarmaya laya ja sakta hai

us ko kahna meri aankhon ke kase mein
did ka ek sikka to dikhaya ja sakta hai

nadan itna mat samjho tum dil ko 'amabar'
kab yaadon se ise bahlaya ja sakta hai