har taraf bikhre haiñ rañgīñ saa.e
rāh-rau koī na Thokar khaa.e

zindagī harf-e-ġhalat hī niklī
ham ne ma.anī to bahut pahnā.e

dāman-e-ḳhvāb kahāñ tak phaile
reg kī mauj kahāñ tak jaa.e

tujh ko dekhā tire va.ade dekhe
ūñchī dīvār ke lambe saa.e

band kaliyoñ kī adā kahtī hai
baat karne ke haiñ sau pairā.e

bām-o-dar kaañp uThe haiñ 'bāqī'
is tarah jhuum ke bādal aa.e

har taraf bikhre hain rangin sae
rah-rau koi na Thokar khae

zindagi harf-e-ghalat hi nikli
hum ne mani to bahut pahnae

daman-e-KHwab kahan tak phaile
reg ki mauj kahan tak jae

tujh ko dekha tere wade dekhe
unchi diwar ke lambe sae

band kaliyon ki ada kahti hai
baat karne ke hain sau pairae

baam-o-dar kanp uThe hain 'baqi'
is tarah jhum ke baadal aae