Subscribe to our newsletter and get our newest updates

Prem Shankar Goila Farhat

  • Ghazal


ye sahn-o-rawish ye shams-o-qamar ye dasht-o-bayaban kuchh bhi nahin


ye sahn-o-ravish ye shams-o-qamar ye dasht-o-bayābāñ kuchh bhī nahīñ
juz apnī had-e-parvāz nazar ai dīda-e-hairāñ kuchh bhī nahīñ

hai mujh se vujūd-e-hast-o-adam yuuñ hast-o-adam haiñ lā ya.anī
ye ziist kā sāmāñ kuchh bhī nahīñ ye umr-e-gurezāñ kuchh bhī nahīñ

ai dast-e-junūñ hai aar tujhe kyuuñ merī qabā-e-hastī se
maiñ chāk-e-jigar kā qaa.il huuñ ye chāk-e-garebāñ kuchh bhī nahīñ

shāmil hai sarisht-e-insāñ meñ tūl-e-shab-e-ġham kā unsur bhī
ye shām-e-firāq-e-ġham-āgīñ sub.h-e-shab-e-hijrāñ kuchh bhī nahīñ

kiina hai tujhe kis daulat se is dāman-e-hastī meñ kyā hai
juz va.ada-e-rabb-e-kaun-o-makāñ ai gardish-e-daurāñ kuchh bhī nahīñ

ik raah pe mujh ko chhoḌ diyā manzil kā pata kuchh bhī na diyā
is baab kī maiñ tamhīd banā jis baab kā unvāñ kuchh bhī nahīñ

qassam-e-azal ne to baḳhshī aadam ko matā-e-izz-o-sharf
ai gardish-e-daurāñ ye to batā kyā azmat-e-insāñ kuchh bhī nahīñ

fitrat hai mirī kuchh is darja mānūs-e-haqīqat ai gulchīñ
taqrīb-e-bahārāñ kuchh bhī nahīñ taḳhrīb-e-gulistāñ kuchh bhī nahīñ

sah.bā-e-girāñmāyā hai atā maddāh-e-mai-ḳhuddārī huuñ
ai jām-o-subū ke shaidā.ī ye ḳhvāhish-e-arzāñ kuchh bhī nahīñ

kyā sharh-e-nigāh-e-dost karūñ dekhā hī nahīñ kuchh is ke sivā
hotā hai ināyat dard bahut aur dard kā darmāñ kuchh bhī nahīñ

vo kashtī-e-dil hī Duub chukī jo ziist kā hāsil thī 'farhat'
ab rāhat-e-sāhil kuchh bhī nahīñ ab shorish-e-tūfāñ kuchh bhī nahīñ

ye sahn-o-rawish ye shams-o-qamar ye dasht-o-bayaban kuchh bhi nahin
juz apni had-e-parwaz nazar ai dida-e-hairan kuchh bhi nahin

hai mujh se wujud-e-hast-o-adam yun hast-o-adam hain la yani
ye zist ka saman kuchh bhi nahin ye umr-e-gurezan kuchh bhi nahin

ai dast-e-junun hai aar tujhe kyun meri qaba-e-hasti se
main chaak-e-jigar ka qail hun ye chaak-e-gareban kuchh bhi nahin

shamil hai sarisht-e-insan mein tul-e-shab-e-gham ka unsur bhi
ye sham-e-firaq-e-gham-agin subh-e-shab-e-hijran kuchh bhi nahin

kina hai tujhe kis daulat se is daman-e-hasti mein kya hai
juz wada-e-rabb-e-kaun-o-makan ai gardish-e-dauran kuchh bhi nahin

ek rah pe mujh ko chhoD diya manzil ka pata kuchh bhi na diya
is bab ki main tamhid bana jis bab ka unwan kuchh bhi nahin

qassam-e-azal ne to baKHshi aadam ko mata-e-izz-o-sharf
ai gardish-e-dauran ye to bata kya azmat-e-insan kuchh bhi nahin

fitrat hai meri kuchh is darja manus-e-haqiqat ai gulchin
taqrib-e-bahaaran kuchh bhi nahin taKHrib-e-gulistan kuchh bhi nahin

sahba-e-giranmaya hai ata maddah-e-mai-KHuddari hun
ai jam-o-subu ke shaidai ye KHwahish-e-arzan kuchh bhi nahin

kya sharh-e-nigah-e-dost karun dekha hi nahin kuchh is ke siwa
hota hai inayat dard bahut aur dard ka darman kuchh bhi nahin

wo kashti-e-dil hi Dub chuki jo zist ka hasil thi 'farhat'
ab rahat-e-sahil kuchh bhi nahin ab shorish-e-tufan kuchh bhi nahin


Leave a comment

+