Subscribe to our newsletter and get our newest updates

Habeeb Moosavi

  • Ghazal


rona in ka kaam hai har dam jal jal kar mar jaana bhi


ronā in kā kaam hai har dam jal jal kar mar jaanā bhī
jān-e-jahāñ ushshāq tumhāre sham.a bhī haiñ parvāna bhī

saarī umr meñ jo guzrī thī ham par vo rūdād likhī
par huī yuuñ mash.hūr ki jaisā ho na koī afsāna bhī

ishq sabhī karte haiñ magar jo hālat mujh par taarī hai
muñh se kahūñ gar haath malegā apnā bhī begāna bhī

pūchhte kyā ho merā Thikānā ek jagah gar ho to kahūñ
rāhguzar hai yaar kā dar hai masjid bhī mai-ḳhāna bhī

rāh-e-talab meñ chalte phirte lākhoñ aate jaate haiñ
ḳhalq meñ hai ushshāq kī manzil ka.aba bhī but-ḳhāna bhī

mujh par vo be-taur ḳhafā haiñ ġhairoñ ke bahkāne se
milnā kaisā baat kahāñ kī band hai aanā jaanā bhī

ek hamīñ kyā pech meñ haiñ us zulf-e-dotā kī ulfat se
mār-e-siyah ham-rañg hai apnā sumbul-e-tar bhī shāna bhī

kar dī sohbat darham-o-barham kis kī chashm ke afsūñ ne
bahkā saaqī Dhalkī botal aur chhalkā paimāna bhī

vaa.iz ke muñh par na kaho kuchh shar.a kī hurmat lāzim hai
rindī meñ mashrūt nahīñ haiñ bāteñ āzādāna bhī

ḳhanjar-e-abrū teġh-e-nigah taqrīr-e-musalsal chashm-e-siyāh
tez bhī hai ḳhūñ-rez bhī dil-āvez bhī hai mastāna bhī

kūche meñ us ke jam.a haiñ āshiq bhiiḌ lagī hai kosoñ tak
shor bhī hai hañgāma bhī hai shāne se chhiltā shāna bhī

ḳhalvat-e-dil meñ chain se baiTho kis se takalluf karte ho
ghar hai tumhārā tum ho yahāñ mehmān bhī sāhab-ḳhāna bhī

naam 'habīb'-e-muztar kā ma.alūm nahīñ sab kahte haiñ
dard-rasīda āfat-dīda vahshī bhī dīvāna bhī

rona in ka kaam hai har dam jal jal kar mar jaana bhi
jaan-e-jahan ushshaq tumhaare shama bhi hain parwana bhi

sari umr mein jo guzri thi hum par wo rudad likhi
par hui yun mashhur ki jaisa ho na koi afsana bhi

ishq sabhi karte hain magar jo haalat mujh par tari hai
munh se kahun gar hath malega apna bhi begana bhi

puchhte kya ho mera Thikana ek jagah gar ho to kahun
rahguzar hai yar ka dar hai masjid bhi mai-KHana bhi

rah-e-talab mein chalte phirte lakhon aate jate hain
KHalq mein hai ushshaq ki manzil kaba bhi but-KHana bhi

mujh par wo be-taur KHafa hain ghairon ke bahkane se
milna kaisa baat kahan ki band hai aana jaana bhi

ek hamin kya pech mein hain us zulf-e-dota ki ulfat se
mar-e-siyah ham-rang hai apna sumbul-e-tar bhi shana bhi

kar di sohbat darham-o-barham kis ki chashm ke afsun ne
bahka saqi Dhalki botal aur chhalka paimana bhi

waiz ke munh par na kaho kuchh shara ki hurmat lazim hai
rindi mein mashrut nahin hain baaten aazadana bhi

KHanjar-e-abru tegh-e-nigah taqrir-e-musalsal chashm-e-siyah
tez bhi hai KHun-rez bhi dil-awez bhi hai mastana bhi

kuche mein us ke jama hain aashiq bhiD lagi hai koson tak
shor bhi hai hangama bhi hai shane se chhilta shana bhi

KHalwat-e-dil mein chain se baiTho kis se takalluf karte ho
ghar hai tumhaara tum ho yahan mehman bhi sahab-KHana bhi

nam 'habib'-e-muztar ka malum nahin sab kahte hain
dard-rasida aafat-dida wahshi bhi diwana bhi


Leave a comment

+