Subscribe to our newsletter and get our newest updates

Tanveer Anjum

  • Ghazal


jachti nahin kuchh shahi-o-imlak nazar mein


jachtī nahīñ kuchh shāhī-o-imlāk nazar meñ
haiñ mehr-o-mah-o-anjum-o-aflāk nazar meñ

ik soz-e-fusūñ gar hai tirī aañkh meñ pinhāñ
hai dil ke liye shauq kā fitrāk nazar meñ

kyā ḳhuub ki kashkol faqīrī se hai aayā
ik ganj-e-girāñ-māya tah-e-ḳhāk-e-nazar meñ

ik ḳhvāb-e-sahar-sāz kā nāyāb ḳhazāna
daryāft kiyā hai tirī bebāk nazar meñ

kuchh aur kahāñ chāhiye is dil ko ki ab hai
dariyā-e-ġham-e-ishq kā pairāk nazar meñ

ye ḳhvāb hai sayyād kā yā ik dil-e-vahshī
ubhrā hai koī tā.ir-e-chālāk nazar meñ

sailāb shaqāvat ke muqābil hai tumhāre
ye fasl-e-mohabbat ḳhas-o-ḳhāshāk nazar meñ

khaa.e haiñ bahut mauj-e-muḳhālif ke thapeḌe
rakkhā hai bahut bahr-e-ḳhatarnāk nazar meñ

malbūs meñ 'anjum' ke haiñ paivand ke gauhar
kyuuñ Thahre ye kamḳhāb kī poshāk nazar meñ

jachti nahin kuchh shahi-o-imlak nazar mein
hain mehr-o-mah-o-anjum-o-aflak nazar mein

ek soz-e-fusun gar hai teri aankh mein pinhan
hai dil ke liye shauq ka fitrak nazar mein

kya KHub ki kashkol faqiri se hai aaya
ek ganj-e-giran-maya tah-e-KHak-e-nazar mein

ek KHwab-e-sahar-saz ka nayab KHazana
daryaft kiya hai teri bebak nazar mein

kuchh aur kahan chahiye is dil ko ki ab hai
dariya-e-gham-e-ishq ka pairak nazar mein

ye KHwab hai sayyaad ka ya ek dil-e-wahshi
ubhra hai koi tair-e-chaalak nazar mein

sailab shaqawat ke muqabil hai tumhaare
ye fasl-e-mohabbat KHas-o-KHashak nazar mein

khae hain bahut mauj-e-muKHalif ke thapeDe
rakkha hai bahut bahr-e-KHatarnak nazar mein

malbus mein 'anjum' ke hain paiwand ke gauhar
kyun Thahre ye kamKHab ki poshak nazar mein


Source: Book : Kulliyat-e-Hafeez Jaunpuri (Pg. Ghazal Number-96 Page Number-123) Author : Tufail Ahmad Ansari Publication : Qaumi Council Baraye Farogh-e-urdu Zaban (2010) Edition : 2010

Leave a comment

+