giraft-e-zīst meñ huuñ qaid-e-be-hisār meñ huuñ
azāb-e-arsa-gah-e-jabr-o-iḳhtiyār meñ huuñ

ḳhayāl hai to abhī DhūñDh phir milūñ na milūñ
abhī maiñ tere uḌaa.e hue ġhubār meñ huuñ

bhaḌak rahā hai badan ruuh ko ḳhabar bhī nahīñ
ye kyā maqām hai ye kaise sho.ala-zār meñ huuñ

maiñ kaun huuñ tire nazdīk ye savāl nahīñ
hubāb huuñ ki sadaf bahar-e-be-kanār meñ huuñ

ḳhud apne aap se har dam huuñ barsar-e-paikār
maiñ apnī zaat ke maidān-e-kār-zār meñ huuñ

meñ bhed kyā tujhe duuñ be-karāñ ḳhalāoñ ke
ki maiñ azal se isī halqa-e-madār meñ huuñ

talāsh kis kī hai mujh ko abhī ye kyā sochūñ
'bashīr' abhī to maiñ apne hī intizār meñ huuñ

giraft-e-zist mein hun qaid-e-be-hisar mein hun
azab-e-arsa-gah-e-jabr-o-iKHtiyar mein hun

KHayal hai to abhi DhunDh phir milun na milun
abhi main tere uDae hue ghubar mein hun

bhaDak raha hai badan ruh ko KHabar bhi nahin
ye kya maqam hai ye kaise shoala-zar mein hun

main kaun hun tere nazdik ye sawal nahin
hubab hun ki sadaf bahar-e-be-kanar mein hun

KHud apne aap se har dam hun barsar-e-paikar
main apni zat ke maidan-e-kar-zar mein hun

mein bhed kya tujhe dun be-karan KHalaon ke
ki main azal se isi halqa-e-madar mein hun

talash kis ki hai mujh ko abhi ye kya sochun
'bashir' abhi to main apne hi intizar mein hun

Source: Book : Karwaan-e-Ghazal (Pg. 291) Author : Farooq Argali Publication : Farid Book Depot (Pvt.) Ltd (2004) Edition : 2004