jo dard-e-jigar meñ kamī ho to jānūñ
qayāmat agar multavī ho to jānūñ

muqaddar na merā bigaḌ kar banegā
kisī kī bhī bigḌī banī ho to jānūñ

mujhe terī furqat meñ jo be-kalī hai
tujhe bhī vahī be-kalī ho to jānūñ

shab-e-ġham meñ kal maiñ ne taare gine haiñ
zarā aañkh merī lagī ho to jānūñ

raqīboñ kī har baat karte ho puurī
mire saath meñ munsifī ho to jānūñ

pas-e-marg 'nādir' vo aa.e bhī to kyā
ināyat agar jiite jī ho to jānūñ

jo dard-e-jigar mein kami ho to jaanun
qayamat agar multawi ho to jaanun

muqaddar na mera bigaD kar banega
kisi ki bhi bigDi bani ho to jaanun

mujhe teri furqat mein jo be-kali hai
tujhe bhi wahi be-kali ho to jaanun

shab-e-gham mein kal main ne tare gine hain
zara aankh meri lagi ho to jaanun

raqibon ki har baat karte ho puri
mere sath mein munsifi ho to jaanun

pas-e-marg 'nadir' wo aae bhi to kya
inayat agar jite ji ho to jaanun