dostoñ ke darmiyāñ bhī ham ko tanhā dekhte
tum kabhī aate sar-e-mahfil tamāshā dekhte

ā.ina-ḳhānoñ meñ kyā rakkhā hai hairat ke sivā
kūcha-o-bāzār meñ ḳhūn-e-masīhā dekhte

maut ko bhī ham banā lete matā-e-zindagī
qatl yuuñ hote ki sab daanā o biinā dekhte

qais kī mānind kyuuñ tasvīr ban kar rah ga.e
parda-e-mahmil uThā kar rū-e-lailā dekhte

meñ tumhāre husn kā be-sāḳhta iz.hār huuñ
apne ā.īne meñ merā bhī sarāpā dekhte

DhūñDne nikle haiñ tujh ko māvarā-e-āb-o-gil
umr guzrī yam-ba-yam sahrā-ba-sahrā dekhte

kyā ye kam hai farsh se tā-arsh ho aa.e 'jamīl'
chaar din kī zindagī meñ aur kyā kyā dekhte

doston ke darmiyan bhi hum ko tanha dekhte
tum kabhi aate sar-e-mahfil tamasha dekhte

aaina-KHanon mein kya rakkha hai hairat ke siwa
kucha-o-bazar mein KHun-e-masiha dekhte

maut ko bhi hum bana lete mata-e-zindagi
qatl yun hote ki sab dana o bina dekhte

qais ki manind kyun taswir ban kar rah gae
parda-e-mahmil uTha kar ru-e-laila dekhte

mein tumhaare husn ka be-saKHta izhaar hun
apne aaine mein mera bhi sarapa dekhte

DhunDne nikle hain tujh ko mawara-e-ab-o-gil
umr guzri yam-ba-yam sahra-ba-sahra dekhte

kya ye kam hai farsh se ta-arsh ho aae 'jamil'
chaar din ki zindagi mein aur kya kya dekhte