Subscribe to our newsletter and get our newest updates

Hafeez Jalandhari

  • Ghazal


dosti ka chalan raha hi nahin


dostī kā chalan rahā hī nahīñ
ab zamāne kī vo havā hī nahīñ

sach to ye hai sanam-kade vaalo
dil ḳhudā ne tumheñ diyā hī nahīñ

palaT aane se ho gayā sābit
nāma-bar tū vahāñ gayā hī nahīñ

haal ye hai ki ham ġharīboñ kā
haal tum ne kabhī sunā hī nahīñ

kyā chale zor dasht-e-vahshat kā
ham ne dāman kabhī siyā hī nahīñ

ġhair bhī ek din mareñge zarūr
un ke hisse meñ kyā qazā hī nahīñ

us kī sūrat ko dekhtā huuñ maiñ
merī sīrat vo dekhtā hī nahīñ

ishq merā hai shahr meñ mash.hūr
aur tum ne abhī sunā hī nahīñ

qissa-e-qais sun ke farmāyā
jhuuT kī koī intihā hī nahīñ

vāsta kis kā deñ 'hafīz' un ko
un butoñ kā koī ḳhudā hī nahīñ

dosti ka chalan raha hi nahin
ab zamane ki wo hawa hi nahin

sach to ye hai sanam-kade walo
dil KHuda ne tumhein diya hi nahin

palaT aane se ho gaya sabit
nama-bar tu wahan gaya hi nahin

haal ye hai ki hum gharibon ka
haal tum ne kabhi suna hi nahin

kya chale zor dasht-e-wahshat ka
hum ne daman kabhi siya hi nahin

ghair bhi ek din marenge zarur
un ke hisse mein kya qaza hi nahin

us ki surat ko dekhta hun main
meri sirat wo dekhta hi nahin

ishq mera hai shahr mein mashhur
aur tum ne abhi suna hi nahin

qissa-e-qais sun ke farmaya
jhuT ki koi intiha hi nahin

wasta kis ka den 'hafiz' un ko
un buton ka koi KHuda hi nahin


Source: Book : Safeer-e-shar-e-dil (Pg. 313) Author : Hafeez Banarsi Publication : Hafeez Banarsi (2007) Edition : 2007

Leave a comment

+