Subscribe to our newsletter and get our newest updates

Faiz Alam Babar

  • Ghazal


lakh bahkae ye duniya ho gaya to ho gaya


laakh bahkā.e ye duniyā ho gayā to ho gayā
dil se jo ik baar merā ho gayā to ho gayā

kyuuñ nadāmat ho mujhe lā-iḳhtiyārī fel par
maiñ tirī nazroñ meñ rusvā ho gayā to ho gayā

kam ziyāda ho to saktā hai magar chhuTtā nahīñ
jis ko jo ik baar nashsha ho gayā to ho gayā

dil bahut rotā hai lekin us but-e-maġhrūr se
munqat'a har ek rishta ho gayā to ho gayā

muntaqil hotā hai lekin vo kabhī martā nahīñ
jo sadā-e-kun se paidā ho gayā to ho gayā

apnī marzī se yahāñ din kāTne ke jurm meñ
maiñ agar duniyā meñ tanhā ho gayā to ho gayā

dekhtā hai kaun 'bābar' kis kā kyā kirdār hai
jis se jo mansūb qissa ho gayā to ho gayā

lakh bahkae ye duniya ho gaya to ho gaya
dil se jo ek bar mera ho gaya to ho gaya

kyun nadamat ho mujhe la-iKHtiyari fel par
main teri nazron mein ruswa ho gaya to ho gaya

kam ziyaada ho to sakta hai magar chhuTta nahin
jis ko jo ek bar nashsha ho gaya to ho gaya

dil bahut rota hai lekin us but-e-maghrur se
munqat'a har ek rishta ho gaya to ho gaya

muntaqil hota hai lekin wo kabhi marta nahin
jo sada-e-kun se paida ho gaya to ho gaya

apni marzi se yahan din kaTne ke jurm mein
main agar duniya mein tanha ho gaya to ho gaya

dekhta hai kaun 'babar' kis ka kya kirdar hai
jis se jo mansub qissa ho gaya to ho gaya


Source: Book : Funoon (Monthly) (Pg. 429) Author : Ahmad Nadeem Qasmi Publication : 4 Maklood Road, Lahore (25Edition Nov. Dec. 1986) Edition : 25Edition Nov. Dec. 1986

Leave a comment

+