Subscribe to our newsletter and get our newest updates

Lalan Chaudhary

  • Ghazal


KHushi apni na ab to lauTti malum hoti hai


ḳhushī apnī na ab to lauTtī ma.alūm hotī hai
unheñ mil kar unheñ kī ho ga.ī ma.alūm hotī hai

asīrān-e-qafas rone se kyā sayyād chhoḌegā
kisī ko kab kisī kī bekasī ma.alūm hotī hai

hamārī sāda-lauhī dekhiye rāh-e-mohabbat meñ
kisī kī dushmanī bhī dostī ma.alūm hotī hai

agar tum ne na pahchānā to kyā ab rañj-e-furqat meñ
mujhe apnī bhī sūrat ajnabī ma.alūm hotī hai

chale aao mirī tanhā.iyoñ par ḳhandāñ haiñ anjum
barastī aag sī ye chāñdnī ma.alūm hotī hai

kahīñ par baiTh kar ārām kī lo saañs nā-mumkin
mujhe ik qahr sī ye zindagī ma.alūm hotī hai

hazāroñ manzileñ tai ho ga.iiñ is ke tufail 'āfat'
mirī rahbar mirī dīvāngī ma.alūm hotī hai

KHushi apni na ab to lauTti malum hoti hai
unhen mil kar unhen ki ho gai malum hoti hai

asiran-e-qafas rone se kya sayyaad chhoDega
kisi ko kab kisi ki bekasi malum hoti hai

hamari sada-lauhi dekhiye rah-e-mohabbat mein
kisi ki dushmani bhi dosti malum hoti hai

agar tum ne na pahchana to kya ab ranj-e-furqat mein
mujhe apni bhi surat ajnabi malum hoti hai

chale aao meri tanhaiyon par KHandan hain anjum
barasti aag si ye chandni malum hoti hai

kahin par baiTh kar aaram ki lo sans na-mumkin
mujhe ek qahr si ye zindagi malum hoti hai

hazaron manzilen tai ho gain is ke tufail 'afat'
meri rahbar meri diwangi malum hoti hai


Leave a comment

+