na pahuñchā saath yārāna-e-safar kī nā-tavānī se
maiñ sar paTkā kiyā ik umr sag-e-saḳht-jānī se

adā fahmān-e-shauq-e-vasl ho tūr-e-tajallī par
maza dīdār kā miltā hai bāñg-e-lan-tarānī se

murīd-e-murshīd-e-himmat huuñ maiñ merī tarīqat meñ
kafan bhī saath laanā nañg hai duniyā-e-fānī se

vo sargarm-e-bayān-e-sozish-e-dāġh-e-mohabbat huuñ
hazar kartā hai sho.ala bhī mirī ātish-bayānī se

hamāre ġhuncha-e-dil ko tabassum kī na dī fursat
rahā ham ko ye shikva lutma-e-bād-e-ḳhizānī se

sharāb-e-ishq kā sāġhar diyā hai mujh ko saaqī ne
na uTThūñgā maiñ mahshar ko bhī apnī sargirānī se

hameñ vo raah batlā.ī hai ḳhizr-e-ishq ne 'aishī'
niahān-e-raftgāñ paidā hai jis meñ be-nishānī se

na pahuncha sath yarana-e-safar ki na-tawani se
main sar paTka kiya ek umr sag-e-saKHt-jaani se

ada fahman-e-shauq-e-wasl ho tur-e-tajalli par
maza didar ka milta hai bang-e-lan-tarani se

murid-e-murshid-e-himmat hun main meri tariqat mein
kafan bhi sath lana nang hai duniya-e-fani se

wo sargarm-e-bayan-e-sozish-e-dagh-e-mohabbat hun
hazar karta hai shoala bhi meri aatish-bayani se

hamare ghuncha-e-dil ko tabassum ki na di fursat
raha hum ko ye shikwa lutma-e-baad-e-KHizani se

sharab-e-ishq ka saghar diya hai mujh ko saqi ne
na uTThunga main mahshar ko bhi apni sargirani se

hamein wo rah batlai hai KHizr-e-ishq ne 'aishi'
niahan-e-raftgan paida hai jis mein be-nishani se

Source: Deewan-e-Waleeullah Muhib