zaḳhmoñ ko kuredā hai to maazī nikal aayā
sūkhe hue dariyāoñ se paanī nikal aayā

us shaḳhs ko paḌhne meñ baḌī chuuk huī thī
vo dost thā jo dushman-e-jānī nikal aayā

tishna the bahut dhuup meñ bhīge hue manzar
kal raat to sūraj se hī paanī nikal aayā

jo shaḳhs nahīñ jāntā islām ke ma.anī
hairat hai ki islām kā daa.ī nikal aayā

go us ne ġhazal apne buḌhāpe meñ kahī hai
ġhazloñ meñ magar rañg-e-javānī nikal aayā

zaKHmon ko kureda hai to mazi nikal aaya
sukhe hue dariyaon se pani nikal aaya

us shaKHs ko paDhne mein baDi chuk hui thi
wo dost tha jo dushman-e-jaani nikal aaya

tishna the bahut dhup mein bhige hue manzar
kal raat to suraj se hi pani nikal aaya

jo shaKHs nahin jaanta islam ke mani
hairat hai ki islam ka dai nikal aaya

go us ne ghazal apne buDhape mein kahi hai
ghazlon mein magar rang-e-jawani nikal aaya

Videos
This video is playing from YouTube Videos
This video is playing from YouTube Nadeem Mahir