chhoḌ kar mujh ko kahīñ phir us ne kuchh sochā na ho
maiñ zarā dekhūñ vo agle moḌ par Thahrā na ho

maiñ bhī ik patthar liye thā buz-diloñ kī bhiiḌ meñ
aur ab ye Dar hai us ne mujh ko pahchānā na ho

ham kisī bahrūpiye ko jaan leñ mushkil nahīñ
us ko kyā pahchāniye jis kā koī chehrā na ho

us ko alfāz-o-ma.ānī kā tasādum khā gayā
ab vo yuuñ chup hai ki jaise muddatoñ bolā na ho

dandnātā yuuñ phire hai shahr kī saḌkoñ pe vo
jaise puure shahr meñ koī bhī ā.īna na ho

log kahte haiñ abhī tak hai vo sargarm-e-safar
mujh ko andesha kahīñ vo raah meñ soyā na ho

mujh ko ai 'manzūr' yuuñ mahsūs hotā hai kabhī
jaise sab apne hoñ jaise koī bhī apnā na ho

chhoD kar mujh ko kahin phir us ne kuchh socha na ho
main zara dekhun wo agle moD par Thahra na ho

main bhi ek patthar liye tha buz-dilon ki bhiD mein
aur ab ye Dar hai us ne mujh ko pahchana na ho

hum kisi bahrupiye ko jaan len mushkil nahin
us ko kya pahchaniye jis ka koi chehra na ho

us ko alfaz-o-maani ka tasadum kha gaya
ab wo yun chup hai ki jaise muddaton bola na ho

dandnata yun phire hai shahr ki saDkon pe wo
jaise pure shahr mein koi bhi aaina na ho

log kahte hain abhi tak hai wo sargarm-e-safar
mujh ko andesha kahin wo rah mein soya na ho

mujh ko ai 'manzur' yun mahsus hota hai kabhi
jaise sab apne hon jaise koi bhi apna na ho